É indignante ver como Xunta e Goberno do Estado ollan para outro lado, un a desviar a atención sobre o outro, no canto de asumiren as súas responsabilidades e, por tanto, indemnizar as persoas mariscadoras mentres duraren as obras de dragaxe da Ría do Burgo (que obviamente as obriga a cesaren temporalmente a súa actividade). Dediqueille á cuestión un artigo que viu a luz nas páxinas de El Ideal Gallego.
Aínda non sabemos nada dos orzamentos do Concello da Coruña para 2022. E estamos a mediados de novembro…! Expreso a miña estupefacción neste artigo, que viu a luz nas páxinas locais da Voz de Galicia, e falo tamén dos orzamentos da Xunta e do Estado en relación á nosa cidade. A foto é da conferencia de prensa que dei co compañeiro Néstor Rego para presentarmos as emendas do BNG ás contas estatais.
Ten na cabeza o Goberno Local que Nostián se acabe convertendo nun apéndice de Sogama? Agardamos que non, mais queremos advertir do serio risco de que iso sexa o que finalmente vaia acontecer. Sobre este asunto publiquei un artigo na Opinión da Coruña. Velaí o tendes.
Pois a verdade é que foi un gran día para o nacionalismo galego este 7N, esta XVII Asemblea Nacional. E a min cóubome a honra de, en nome do BNG da Coruña, pronunciar o saúdo de benvida ás máis de 3 mil persoas que ateigaron o Coliseum. Eis tendes o texto da miña intervención.
A política vai de optar. Hai 15 millóns de euros disponíbeis na Facenda local e o Goberno de Inés Rey quere empregalos na compra dos peiraos de Batería e Calvo Sotelo. Fixádevos: na compra de terreos que xa son públicos. Un despropósito. Nós o que pedimos é que se invistan nos barrios. A tese desenvólvoa nun artigo que viu a luz nas páxinas de El Ideal Gallego.
Con razón provocou indignación e vergoña allea a entrega do programa televisivo MasterChef realizado na nosa cidade. Non puiden menos que escribir unhas liñas ao respecto que viron a luz nas páxinas de La Opinión. Agardo que vos preste a súa lectura!
Pois si, coñézovos ben Os Mallos. E un barrio que sinto como propio. E sobre a súa situación actual impulsamos desde o BNG unha moción que, ao ser asumida por todos os grupos, foi aprobada por unanimidade no Pleno do xoves 7 de outubro. De como vexo o asunto vai este artigo que publiquei nas páxinas de El Ideal Gallego o pasado domingo.
Un dos maiores problemas que temos como cidade é o da desindustrialización. Non é posíbel modernizarmos o noso tecido produtivo sen un sector industrial vizoso, con capacidade de crear valor engadido e dar soporte a empregos de calidade. O último elo da cadea en perigo é o de Alu Ibérica, a antiga Inespal. Falo sobre iso no artigo que publiquei en La Opinión de A Coruña este domingo.
Pois si, algo de teatro, e dunha calidade non moi boa, estamos a vivir, máis ben a sofrer, en María Pita. Diso vai o artigo que veño de publicar nas páxinas de La Voz de Galicia. Con el vos deixo.
O pasado xoves 16 de setembro inaugurouse a mostra que conmemora as dúas décadas de vida do xornal “La Opinión A Coruña”. Asistín ao acto, na compaña da nosa portavoz nacional, Ana Pontón. Con ela e coa directora de La Opinión posei na foto que acompaña estas liñas. E para me unir á celebración do aniversario escribín o artigo que vos achego a seguir.