Bo día. Hai uns meses acudín convidado por unha asociación a visitar varios comercios do meu barrio para coñecer as inquedanzas e propostas dos comerciantes
E un, que vos aseguro non estaba afiliado ao BNG, díxome que estaba convencido de que todos os concellos de Galiza necesitaban, cando menos, 8 anos de pasada polo BNG.
E é certo!
Abonda con ir a Allariz para ver como se conseguiu reverter a dinámica de esmorecemento e despoboamento nun Concello da Galiza interior.
Abonda con ir a Pontevedra para coñecer unha cidade á medida das persoas e comprenderpor que é unha referencia internacional.
Abonda con ir a Ribadeo para constatar como se pode revitalizar un casco histórico e dinamizar o pequeno comercio.
Os Gobernos municipais do BNG son exemplo de SOLVENCIA, CAPACIDADE, BO FACER.
Pero tamén son exemplo de TALENTO, INNOVACIÓN, CREATIVIDADE,
A creatividade de Tomiño para mostrar como se pode revitalizar un antigo mercado
A de Muras para, fronte ao espolio, poñer a produción de electricidade ao servizo dos cidadáns
A de Carballo transformando as medianeiras nun museo ao ar libre, referencia na arte urbana
A de e todos e cada un dos Concellos con alcaldía do BNG.
E todo ese bo facer querémolo poñer ao servizo de impulsar A CORUÑA.
Para facer da Coruña a CIDADE BARCO, A CIDADE FARO, A CIDADE LUZ.
Cidade luz porque pola súa tradición cultural, pola súa conexión coas correntes máis avanzadas de cada momento, pola súa creatividade, A Coruña ten que ser a nosa cidade das luces.
Cidade barco,porque reúne todas as condicións para ser a capital ecolóxica do mar
Cidade faro,porque como dixo Domingos Merino, o primeiro alcalde nacionalista da nosa cidade, A Coruña ten que ser un faro para Galiza. E un faro tamén na defensa e normalización do noso idioma.
Unha NOVA GALIZA CONCELLO A CONCELLO,di o noso lema.
E “Coller impulso e dar o salto”, dicía un poema de Lois Pereiro.
Fagámolo: collamos impulso, na Coruña e no resto de vilas e cidades do noso país.
Collamos impulso e deamos o salto para facer realidade esa NOVA GALIZA CONCELLO A CONCELLO.
O BNG é hoxe a esperanza de cambio e de futuro para grande parte das galegas e galegos.
E ese futuro comeza o 28 de maio.
Coa vosa forza ímolo conseguir!