Cidade deportiva

O BNG entende o “Deporte” no seu sentido amplo, como un conxunto de  actividades físicas, deportivas e recreativas orientadas a favorecer a integración e a calidade de vida das persoas, incluíndo a toda a comunidade, sen discriminación de idade, sexo, condición física, social, cultural, étnica ou racial, máis tamén como un medio esencial que garante calidade de vida e aumente os anos de vida saudábeis.

O deporte coruñés ten que ser un exemplo para a cidadanía, que cumpra cunha política orientada a favorecer a integración, e a calidade da vida das persoas sen discriminacións, que sexa transversal, e que axude a crear unha sociedade mellor.

O obxectivo do BNG será desenvolver un modelo deportivo coruñés que ca axuda das políticas feministas, logre mellorar a súa vertente educativa, de promoción do deporte base, e da actividade física saudábel, así como o ámbito competitivo, que impulse a actividade profesional deportiva de alto nivel, e sempre libre de discriminacións, que sexa integrador, para que chegue a todas as idades e colectivos, é para iso, é preciso ofrecer programas adaptados, que perduren no tempo, e se organicen de forma interdisciplinar dende as distintas concellarías do concello, para que ninguén se quede fora.

Para lograr estes obxectivos será fundamental non só colaborar cos movementos asociativos veciñais, educativos, feministas, deportivos e colectivos que traballan en temas relacionados coa saúde, a mobilidade, e as necesidades educativas especiais, alén de institucións públicas, se non tamén darlles ferramentas que poidan usar, coma facilitar información e formación.