Cidade metropolitana

Programa · A Coruña cidade metropolitana

A Coruña real non remata nos límites do noso termo municipal. Milleiros de persoas residentes nos concellos da contorna acoden acotío á nosa cidade, e o mesmo ocorre á inversa. O porto exterior e importantes polígonos industriais están en Arteixo, o Aeroporto en Culleredo, o encoro que nos abastece de auga en Cambre e Abegondo… Para deseñarmos A Coruña do futuro é imprescindíbel articularmos esta realidade metropolitana.

Impulsaremos a constitución da Área Metropolitana da Coruña e concertarémola de políticas a escala comarcal.

En particular, promoveremos a prestación de servizos compartidos e a coordinación de políticas nos seguintes eidos:

Recollida e tratamento de residuos sólidos urbanos.
Xestión integral do ciclo da auga e elaboración dun plan da auga.
Planificación integral do transporte a escala comarcal.
Planificación urbanística e ordenación do territorio, no que ten a ver con usos residenciais, industriais, de servizos e protección ambiental.
Planificación e promoción turística.
Planificación dos servizos sociais públicos.

Mentres a área metropolitana non for unha realidade xurídica, co fin de atallar os importantes problemas de mobilidade da nosa comarca, comprometémonos a impulsar a creación dun Consorcio de Transporte Metropolitano cos seguintes obxectivos:

Mellorar as conexións entre A Coruña cos concellos veciños e as conexións destes entre si sen necesidade de pasar pola cidade central.
Implantar servizos ferroviarios de proximidade (modelo tren-tram). Con tal fin, demandarase a modernización da liña ferroviaria A Coruña- Betanzos- Ferrol, o aproveitamento do tendido ferroviario existente entre A Coruña e Arteixo e o aproveitamento do tendido ferroviario que discorre polo porto interior.
Poñer en marcha de transporte público marítimo.
Crear aparcamentos disuasorios próximos ás paradas de bus metropolitano e emprazamentos onde aínda estea operativo o tren para facilitar o uso do transporte público nos concellos da comarca.

Avance na execución da recuperación integral da Ría do Burgo: compromiso co desenvolvemento da actividade marisqueira xeradora de emprego e coa rexeneración medioambiental para que a Ría do Burgo sexa un espazo de lecer e goce da natureza para todas as persoas que habitan na nosa comarca.
Mantemento do Concello da Coruña na da Mesa da Ría.
Control constante do sistema de saneamento da cidade da Coruña para evitar verteduras á ría do Burgo.

Exixencia os investimentos necesarios para mellorar o aeroporto de Alvedro, nomeadamente os seguintes:
- Ampliación da terminal.
- Mellora dos accesos acometendo a conexión directa coa AP-9.
Reclamación da transferencia da competencia sobre os aeroportos galegos a Galiza para xestionalos conxuntamente coas autoridades locais e outras entidades públicas co fin de artellar un sistema aeroportuario integrado galego, baseado na cooperación, colaboración e igualdade dos tres aeroportos galegos. Os obxectivos da transferencia de competencias son os seguintes:
- Planificar desde aquí as infraestruturas aeroportuarias.
- Proxectar, executar e controlar os investimentos nos nosos aeroportos.
- Organizar os servizos dos nosos aeroportos.
- Deseñar as conexións desde unha perspectiva integrada das tres terminais galegas coas principais cidades da Península, cos catro grandes sistemas aeroportuarios europeos e con aqueles países onde a diáspora galega ten forte presenza.
- Potenciar o tráfico de mercadorías.
- Dotar dunha rede de conexións intermodais entre os tres aeroportos e as cidades galegas: en primeiro lugar, a través de servizos de lanzadeiras por estrada; a medio prazo, tamén por medio do ferrocarril e/ou do tren de proximidade.

Demanda da implantación do tren de proximidade aproveitando as vías xa existentes que nos levan até o corazón da cidade.
Exixencia da modernización das liñas ferroviarias entre a nosa cidade e Ferrol e Lugo.
Impulso á creación dun intercambiador en San Diego, que conecte servizos ferroviarios de proximidade, transporte marítimo e liñas de autobús.
Reclamación da transferencia a Galiza dos servizos ferroviarios.

Cidade metropolitana

Alternativa Proxecto de cidade Solucións á mobilidade Unha razón: A Coruña Punta de lanza de Galiza A Coruña dos Barrios Calidade de vida Deporte é saúde Capital cultural