Cidade para vivir

Nos terreos do porto temos a oportunidade de comezar a definir o futuro da cidade, son un elemento chave na cidade modelo á que aspira o BNG. Nos usos que se lles dean empezarán a dilucidarse catro grandes cuestións de futuro: a mobilidade, o modelo produtivo, os equipamentos públicos e o espazo verde libre que permita volver abrir a cidade ao mar.

1. Esixencia ao Goberno central da condonación da débeda contraída polo Porto da Coruña con Portos do Estado para financiar a construción do porto exterior ou doutras solucións financeiras que en ningún caso representen unha hipoteca para o futuro da cidade, nin unha desigualdade de trato a respecto das solucións dadas noutros portos de interese xeral do Estado.
2. Esixencia da devolución á cidade sen cargas adicionais dos terreos do Porto Interior que resulten desafectados das actividades portuarias.
3. Constitución dun consorcio, coa participacións das distintas administracións e entes implicados, para impulsarmos a transformación dos terreos do porto interior.
4. Fronte aos modelos dos convenios de 2004 polos que se pretendía vender os terreos do porto interior para a construción de centros comerciais, hoteis e vivendas, propoñemos que a cidade lidere a transformación do Porto interior en base ao mantemento da titularidade pública e aos seguintes usos:
   • Usos produtivos: o porto interior ten que seguir sendo un motor económico en materia pesqueira e de tráfico de mercadorías, mais tamén con espazos para a investigación, o desenvolvemento e a innovación (I+D+i), promovendo o estabelecemento de industria innovadora vinculada á economía do mar.
   • Zonas verdes e de lecer.
   • Equipamentos públicos: o porto é un espazo ideal para ampliarmos equipamentos públicos necesarios para a cidade, especialmente do ámbito social -posibilidade de instalar a Biblioteca Central da cidade, escola infantil, residencia para estudantado e investigadoras/os, centro de día- mais tamén do ámbito sanitario.
5. Impulso á creación dun intercambiador de transporte martítimo-terrestre que inclúa o aproveitamento do tendido ferroviario existente para pór en marcha servizos de tren de proximidade.
6. Apertura do porto á cidade para recuperar e valorizar a identidade mariñeira da cidade:
   • Difusión da actividade económica da Lonxa para o coñecemento común e a valoración da cidadanía da Coruña.
   • Compromiso de continuar coa apertura de terreos do porto.
   • Procura dun acordo co Porto para a musealización do barco “Orzán”.
   • Protección e posta en valor da lonxa do Gran Sol.
   • Creación dun escola municipal de deportes náuticos que inclúa tamén a aprendizaxe e goce das embarcacións tradicionais.
   • Promoción da instalación de pantaláns para embarcacións tradicionais e a celebración de encontros nacionais e internacionais.
   • Recuperación do bordo litoral de Oza, en particular os vestixios do antigo castelo de San Diego e a rehabilitación integral do conxunto formado pola capela, faro e lenzos das antigas murallas de Oza.
   • Oposición á instalación dunha planta de tratamento de residuos no porto de Oza por ser incompatíbel cos devanditos obxectivos.

1. Reformar EMVSA para que sexa realmente unha empresa pública de vivenda, que favoreza o dereito de acceso á vivenda mediante o incremento do parque público existente e o desenvolvemento de políticas que contribúan a incentivar e regular o mercado de alugueiro:
   • Ampliar o financiamento da encomenda de xestión do banco de vivendas de aluguer de vivendas de EMVSA para aumentar o número de vivendas, realizar unha oferta específica para colectivos en situación de vulnerabilidade, mais tamén para que esta funcione como avalista e financie os seguros de impagamento que hoxe en día son un impedimento para o acceso a unha vivenda en réxime de aluguer.
   • Ofrecer, ben desde EMVSA ou ben desde os propios servizos municipais, asesoramento legal as persoas que queren acceder a unha vivenda en réxime de aluguer para evitar abusos nos requisitos que impoñen algúns alugueiros.
2. Demandar do Estado que as vivendas xestionadas pola SAREB (Sociedade de Xestión de Activos procedentes da Reestruturación Bancaria) sexan destinadas á oferta de vivenda protexida.
3. Promoción da construción de vivenda pública municipal, establecendo mecanismos de cara á rehabilitación de inmobles para vivenda pública e mantendo a esixencia actual do 40% de vivenda pública en novos desenvolvementos urbanos.
4. Impulso do aloxamento interxeracional.
5. Apoio firme ao modelo de cooperativas en cesión de uso, establecendo canles de apoio e acompañamento, especialmente na busca de financiamento, a este tipo de iniciativas como parte da economía social da cidade, incluso xerando liñas propias de financiamento a proxectos singulares.
6. Creación dun Observatorio de Vivenda que analice a situación a escala metropolitana e realice informes e propostas, facendo os seus datos públicos.
7. Creación dunha Mesa Municipal de Vivenda, con grupos de traballo temáticos/sectoriais, como un proceso participativo permanente na busca da colaboración entre diferentes administracións e entidades públicas, privadas e veciñais, co obxectivo da elaboración de propostas de cara a afrontar o problema da vivenda, incluso plantexándose a elaboración dun Plan de Vivenda que tentará sexa de escala metropolitana.

1. Desenvolvemento de novas áreas de rehabilitación urbana na cidade, que impliquen o estabelecemento de oficinas de rehabilitación no mesmo barrio, cando menos no Barrio das Flores, nos Mallos e na Agra do Orzán.
2. Aumento das partidas orzamentarias destinadas a rehabilitación e accesibilidade e da porcentaxe subvencionábel para cada vivenda.
3. Incremento dos recursos humanos e técnicos do Concello no asesoramento á rehabilitación de vivendas.
4. Execución real da posibilidade de adiantamento do ingreso das subvencións para que as comunidades de veciños e veciñas poidan afrontar o pagamento das obras de rehabilitación e accesibilidade.
5. Elaboración dunha listaxe de soares baleiros e estudo das posibilidades de uso de cada un deles.
6. Elaboración dunha análise das estruturas sen rematar na cidade para estudar cada unha das circunstancias e impulsar a súa construción.
7. Condicionamento de todas as axudas á rehabilitación á posta en alugueiro dos bens rehabilitados sempre e cando estes non foren os de residencia habitual.
8. Flexibilización, agás en edificios de valor patrimonial, as ordenanzas no relativo á reforma de vivendas, para incrementar a oferta de pisos adaptados ás necesidades dos e das demandantes actuais, asegurando sempre estándares de habitabilidade.
9. Condicionamento de todas as axudas para a instalación de elementos de accesibilidade á non suba do alugueiro: de xeito que as persoas alugadas non vexan repercutido no prezo do seu alugamento a instalación destes elementos cando para a súa instalación o propietario do inmóbel reciba cartos públicos.
10. Emprego do Servizo de Mediación Municipal para actuar en casos en que hai dificultades en comunidades de veciñas/os de chegar a acordos para realizaren obras de accesibilidade e/ou rehabilitación, especialmente no caso da rehabilitación enerxética, explicando os beneficios vitais e económicos de levar adiante este tipo de obras.
11. Impulso de alternativas que permitan a instalación de ascensores en todos os edificios como os “ascensores comúns a unha mazá de vivendas”.
12. Revisión do censo de locais e edificios municipais, con datos sobre o seu estado, usos e orzamento necesario para a súa rehabilitación para así elaborar unha planificación de investimentos e un regulamento para que a cidadanía e as entidades poidan empregalos.

1. Creación da Oficina Municipal de Vivenda actuará coordinadamente cos servizos sociais do Concello e coa área responsábel en materia de vivenda, para levar a cabo, entre outras, as seguintes accións:
   • Campañas de información á cidadanía sobre os seus dereitos nos procesos de execución hipotecaria e ante as entidades financeiras.
   • Asistencia ás familias afectadas por procesos de execución hipotecaria e desafiuzamento, reconducíndoas aos servizos sociais do Concello cando requiriren axudas ou prestacións para orientalas e asignarlles o recurso mais idóneo.
   • Creación dun sitio web propio que lle ofreza información á veciñanza sobre as actuacións da Oficina, os recursos municipais dispoñíbeis para familias en procesos de desafiuzamento e orientación sobre os principais problemas e dificultades a que deben facer fronte.