Cidade verde e azul

Programa · A Coruña cidade verde e azul

O BNG avoga por unha Coruña Verde, comprometida de xeito activo na loita contra o cambio climático, a defensa do medio ambiente e a recuperación e posta en valor dos nosos espazos naturais.

Unha Coruña que recupere e poña en valor os espazos naturais da contorna da cidade, impulsando un grande corredor verde, a renaturalización do curso dos nosos ríos e a recuperación e posta en valor do noso patrimonio, como o Castro de Elviña e a súa contorna.

Unha Coruña que desfrute de ámbitos da nosa costa renaturalizados, de aneis verdes na cidade consolidada, de barrios reverdecidos con novos parques e outras infraestruturas verdes como os xardíns verticais.

Unha Coruña que aposte por un novo modelo de mobilidade que reduza o impacto do transporte na pegada de carbono e por un modelo de tratamento do lixo baseado decididamente na redución, reciclaxe e reutización. Unha cidade onde as coruñesas e coruñesas podan desfrutar dunha ratio de zonas verdes por habitante conforme as recomendacións da Organización Mundial da Saúde (OMS).

Elaboración dun plan da auga metropolitano con medidas de aforro e racionalización dos recursos hídricos.
Conservación e recuperación, dependendo dos casos, das fontes da cidade como un valor ambiental e patrimonial importante.
Posta en valor dos ríos existentes na cidade: non só dos que aínda se conservan en superficie senón tamén daqueles que foron canalizados, como o río Monelos.
Saneamento integral do concello, o que implicará pór en marcha as seguintes medidas:
- Completar as redes de sumidoiros con separación de augas pluviais e fecais.
- Dispór medidas de recomendación construtiva de vivendas e urbanizacións para o aforro no uso das augas potábeis, de reutilización das augas, permitindo a drenaxe sostíbel dos solos e a redución das augas residuais.
- Realizar as obras precisas para o funcionamento axeitado da Edar de Bens.
- Abordar, sempre que for viábel, tratamentos que tendan á reutilización da auga para usos produtivos.

Defensa do modelo húmido/seco característico da Planta de Tratamento de Residuos Sólidos Urbanos de Nostián de cara a acadar a máxima reciclaxe e compostaxe, cunha verdadeira transparencia a respecto da cantidade de residuos que alí se deposita e adoptar as medidas necesarias para que na planta a fracción orgánica sirva para a obtención de compost de calidade.
Fomento da compostaxe doméstica nomeadamente en ámbitos de asentamentos dispersos e alí onde hai vivendas con horta ou xardín, así como a compostaxe comunitaria en espazos públicos urbanos.
Apoio ás iniciativas do tecido social da cidade baseadas na compostaxe e na reciclaxe.
Garantía dunha frecuente recollida do cartón e do vidro para evitar a acumulación excesiva e as imaxes de colectores rebordados que desincentivan a reciclaxe.
Realización de campañas masivas para a información de como debe de separarse en orixe os residuos sólidos urbanos e dos puntos onde se deben depositar outros residuos.
Realización de campañas masivas para a información sobre materiais domésticos alternativos ao uso de plásticos dun só uso: palliñas, tazas de café, botellas de auga, envoltorios, bolsas reutilizábeis… e estudo da posibilidade de distribución destes.
Introdución do uso de envases reutilizábeis nos mercados municipais.

Regulación e, no seu caso, impulso de medidas de supresión ou minoración dos impactos paisaxísticos e dos riscos para a saúde: liñas de alta tensión, localización dos centros de distribución, soterrado das liñas de media tensión en núcleos de poboación e de baixa tensión que afecten a conxuntos histórico-artísticos e monumentos.
Control da contaminación lumínica, segundo criterios luminotécnicos ou de eficiencia enerxética e ambientais, producida polos sistemas de iluminación exterior.
Desenvolvemento dun plan de revisión do sistema de iluminación pública segundo criterios técnicos, ambientais e de xénero.
Colocación de instalacións térmicas ou fotovoltaicas nos edificios públicos municipais de cara a convertelos en referencia para a cidadanía das boas prácticas ambientais.
Estudo das fórmulas de apoio e implicación do concello na creación de comunidades enerxéticas a diferentes escalas, dende a agrupación de consumidores/produtores ata as iniciativas de escala metropolitana. Creación dunha oficina de impulso e formación en colaboración coas iniciativas xa existentes tanto públicas como privadas.
Fomento entre a poboación as enerxías limpas e alternativas facilitando o asesoramento técnico ou/e a xestión de subvencións, incentivos fiscais.

Dotación daqueles espazos urbanos degradados de novos usos para a comunidade, entre outros, o de hortas urbanas comunitarias.
Posta en valor e uso as terras que non se traballan, dirixíndose aos propietarios de fincas que non se traballan para que se poidan ceder temporalmente e de xeito gratuíto para hortas urbanas.
Catalogación do patrimonio ambiental con medidas para a súa preservación e vixilancia, a restauración e a valorización ambiental, social e económica.
Compromiso do cumprimento do Plan de conservación do Espazo Natural de Interese Local das Illas de San Pedro.
Impulso do Plan de conservación do Espazo Natural de Interese Local da Torre de Hércules.
Publicitación e fomento do uso de camiños e roteiros na natureza en colaboración co tecido deportivo da cidade.
Conservación das especies arbóreas autóctonas nos principais parques, e aposta polas especies autóctonas cando haxa que plantar nova flora.
Reverdecemento dos barrios: incluíndo desde arbustos até arborado nas beirarrúas do interior dos barrios até o aumento de zonas verdes propiamente ditas e accesíbeis para a cidadanía.
Avance na execución da recuperación integral da Ría do Burgo e compromiso co mantemento da Mesa da Ría.

Realización de actividades divulgativas e formativas a respecto do consumo consciente, xusto e responsábel.
Fomento dun consumo responsábel que busque a redución dos residuos, apoiando as redes de consumo responsábel e a produción local e de temporada.
Creación do selo de calidade que identifique os establecementos que sigan as pautas do movemento de slowfood e zerowaist, cara ao seu fomento e a súa contribución no aumento da calidade de vida sustentábel.
Apoio á realización de mercados de troco e de segunda man.
Declaración da Coruña como concello libre de transxénicos.

Compromiso con que non se apoiarán, soportarán ou patrocinarán por parte do Concello da Coruña a realización de espectáculos con animais, como as touradas ou os circos.
Transporte público que permita a entrada de animais para o impulsar como xeito de desprazamento aberto, sustentábel e inclusivo.
Aposta polo modelo de sacrificio cero no Centro Municipal de Animais de Compañía e revisión profunda da concesión para avaliar as posibilidades de municipalizar ou adxudicar o servizo a partir de criterios non lucrativos ou empresariais.
Impulso dunha estratexia de concienciación mediante campañas e iniciativas para fomentar o respecto, a protección e o benestar dos animais, e promoción da adopción no Centro Municipal de Animais de Compañía.
Creación do Consello Municipal de Convivencia e Protección Animal como organismo de participación cidadá e sectores implicados, e como promotor da avaliación e proposición de políticas e servizos municipais de protección e benestar animal.
Fomento do modelo de xestión ético das colonias felinas que inclúa a súa esterilización, control veterinario e alimentación en corresponsabilidade coas ONG, fomentando a participación da veciñanza.
Loita contra o comercio ilegal de animais e a súa publicidade en cumprimento da normativa local e procurando a cooperación da administración autonómica.
Estabelecemento de horarios e zonas de lecer para animais domésticos en espazos verdes e praias da cidade con criterios de convivencia veciñal.
Posta en marcha de políticas e campañas que fomenten a tenza e o coidado responsábel dos animais: limpeza e recollida de excrementos, paseo con correas etc.

Cidade verde e azul

Alternativa Proxecto de cidade Solucións á mobilidade Unha razón: A Coruña Punta de lanza de Galiza A Coruña dos Barrios Calidade de vida Deporte é saúde Capital cultural