Benvid@s a este Encontro nacional que ten lugar no Edificio Sindical da Coruña, situado nesta Rúa Lamelas, moi perto da Avenida da Vedra.
Porque así se chamaba e así se debería chamar.
A Vedra e non Alfonso Molina.
A Vedra, porque Alfonso Molina foi un alcalde franquista, que entre outros méritos tivo o de ser un colaborador decisivo para que os Franco se apropiasen do Pazo de Meirás.
A Vedra, porque esta cidade ten unha riquísima microtoponimia que cómpre recuperar e poñer en valor.
Como hai que poñer en valor a nosa lingua e impulsar a súa plena normalización.
“Se aínda somos galegos é por obra e gracia do idioma”, dicía Castelao
E para nós, como para os fundadores das Irmandades da Fala, Galiza é célula de universalidade.
Ser Galegos é a nosa forma de estar no mundo. Somos universais, precisamente porque somos galegos.
No idioma está impresa a nosa memoria como pobo.
O idioma é un compoñente fundamental da nosa identidade.
E termos unha lingua propia, que ademais é a matriz dun sistema idiomático con máis de 270 millóns de falantes no mundo, debe ser fonte de riqueza e progreso.
Por iso douvos a benvida a unha cidade que por fin ten unha ordenanza para o impulso da lingua galega, grazas ao impulso do BNG.
Aínda que non abonda. Necesitamos un goberno local que non se conforme con que haxa unha ordenanza, senón que vele para que se cumpra e impulse a normalización.
Benvidos á cidade na que naceron a Academia Galega e as Irmandades da Fala
Na que naceu o nacionalismo histórico e tamén o BNG.
En setembro cúmprense 40 anos. Agardámosvos no Frontón de Riazor.
Boa xornada de traballo e que MEDRE A LINGUA
Para que o Galego e Galiza dure mil primaveras máis
Deíxovos xa con Ana Pontón.
Moitas grazas