Teñamos o valor de darnos un futuro

“Teñamos o valor de darnos un futuro”, reza a felicitación do BNG da Coruña para este ano novo, extraída dun poema do xornalista e escritor coruñés Manuel Álvarez Torneiro.

O meu desexo para 2022 é que dunha vez por todas venzamos a Covid e as súas consecuencias e teñamos o valor de darnos un futuro, aprendendo das leccións que a pandemia nos deixou.

Por exemplo, a importancia de termos uns servizos e unhas políticas públicas robustas e eficaces, imprescindíbeis para asegurar a saúde, o benestar e a protección social. Teñamos o valor de darnos un futuro, facendo que A Coruña sexa un referente.

Ou a importancia da ciencia. Nunha cidade con institucións do relevo do INIBIC e científicos do prestixio internacional de Diego Gónzález Rivas, teñamos o valor de darnos un futuro, poñendo en valor a nosa ciencia e  investigación. 

Tamén a importancia da economía propia, para non sermos dependentes en exceso dos suministros do exterior. Teñamos o valor de darnos un futuro, mobilizando e poñendo en valor os nosos recursos para que A Coruña sexa o motor económico que Galiza necesita.

A pandemia tamén nos ensinou a importancia de termos cidades á medida das persoas, cun espazo público de calidade. Na Galiza temos modelos como Pontevedra que son unha referencia mundial.

Teñamos o valor de darnos un futuro, superando modelos urbanísticos do pasado, para facer da Coruña un modelo de calidade urbana e de democratización do espazo público.

Desexo ás coruñesas e coruñeses saúde, progreso e xustiza.

E que entre todas e todos teñamos o valor de darnos un futuro, facendo da Coruña unha cidade modelo.

Comparte, se queres!

Deixa un comentario